අනේ තොපිලෑ සිංහ ලේ ….

පැයෙන් පැය එක බැගින් පරවෙන කිරි සුවඳ ඇති මල් කැ ලේ…..
එම දමෙන් ගත් මල් දමා යති කසල බඳුනෙහි කඩ පි ලේ….
ගුරුන්ටත් නිති අකුරු වරදිති රති නොවරදින පාසැ ලේ….
සමත් කම් මොනවාට කියමුද අනේ තොපිලෑ සිංහ ලේ…..

මවක දුවකට මගක යන්නට නොකැප ගිණියම් දහව ලේ….
රැයද උදයද ළපටි මහළුද වැදුව මවුනද නොම බැ ලේ……
යටව තැන තැන තරුණ කම ඇත එකට වැළලී මිනි ව ලේ….
සුවය සහනය කුමට කියමුද අනේ තොපිලෑ සිංහ ලේ…..

බුදුන් දම් තෙරුවණම විකිණෙති අකැප කැප වුණු පන්ස ලේ…..
දුකම දෙවියන් අහර කර ගති පල්ලි, දෙවොලේ, කෝවි ලේ….
ගතට පණ ඇති, හිතට පණ නැති නොමළ හොල්මන් තිප්ප ලේ…..
අහා ඇති තෙද කුමට කියමුද අනේ තොපිලෑ සිංහ ලේ….

ගෙදර බුදු පිඬු සිඟා යනවිට පෙන්නමින් බොර තෙල් බ ලේ….
මරණ, කෙළෙසන, යකඩ ඇණ යන, කඳින් වෙන් කළ ඉහ මො ළේ….
මැදක පෙරදිග පයක කඳුළක තවරමින මෙහෙකම් ක ළේ…
එවන මසු ලෝ දියෙහි දිය වෙන අනේ තොපිලෑ සිංහ ලේ…..

උපන් බිම දුක ගැහැට මග හැර විඳින්නට සැප ලෝ ත ලේ….
සපන් සැම දූ පුතුන් පිට වෙති පුදා සිප් සත පා මු ලේ….
එවන් තටු නැති එවුන් සැඟවෙති අතර මග සමුදුරු ජ ලේ….
ඔවුන් එය රූ තිරෙන් පෙන්වති, අනේ තොපිලෑ සිංහ ලේ….

ලෙඩට දුකකට වැඩට ගිය සඳ ඇඟට පැන පුපුරා හැ ළේ…..
මුවඟ අසළින් ගියද කුඩ මැසි වැඩ වරා පෙන්නයි බ ලේ…..
අයද මහ රට කරන සැම සඳ තවරගෙන ඇත හත් ප ලේ ….
අයද නොදකිං වැයද නොදකිං අනේ තොපිලෑ සිංහ ලේ…..

අරුණ හිමිදිරියේ පටන් පර සුද්දාට බැණ බැණ බො ලේ…..
කරන සැම කාරියට සරණයි උන් තැනූ විදු නැණ බ ලේ…..
පරණ පරපුර ඉතිරි කළ දෙය සිහිව ඇඳිවත බිම හැ ලේ……
මැරුණ ඊයේ මිස අදක් නැති, අනේ තොපිලෑ සිංහ ලේ…..

අලස තිරිසන් සතෙකුගේ සටහන් තිබෙයි ජානය වි ලේ…
විලස උහු හැසිරෙනු විනා මිනිසත් කමින් කිම ඇති ප ලේ…..
මෙලෙස කියමුද සතෙකු අත ආදිතම මවු නිරුවත් ක ලේ…..
පලස විල්ලුද පිටට කුස ගිය, අනේ තොපිලෑ සිංහ ලේ…..

පැත්ත බැලුවොත් පැත්ත පමණයි ඇත්ත පොළවට යට ක ලේ…

කැත්ත පොල්ලම දිනනු මිස නැත දත්ත විමසන සිහි මො ළේ….

සත්තකයි රෙදි කරට අරගෙන රැකිය යුතුමය සැම කළේ…..

වත්ත බද්දට ඇස්ස ඇපවුණු අනේ තොපිලෑ සිංහ ලේ….

Advertisements

15 thoughts on “අනේ තොපිලෑ සිංහ ලේ ….”

  1. කාලෙකින් දැකපු ලස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්සන කවි පෙළක් 🙂

  2. ඉතා අගනා කවි පෙළක්. හරියට එස්. මහින්ද හාමුදුවන්ගේ වාග් විලාශය ආදර්ශය අරන් ලිව්වා වගේ. මේ කවි ලිවීමේදී පේළි එක ගන්නට තබා ලියන්න පුළුවන්. එක කරන්නේ මෙහෙමයි. වර්ඩ් ලිපියක් විවෘත කර, insert >table යන්න. දැන් කවි පදයේ ස්වරූපය අනුව එක raw එකකට columns කීයක් ඕනෙද කියලා හිතන්න.

    උදාහරණය: – ‘වත්ත බද්දට ඇස්ස ඇපවුණු අනේ තොපිලෑ සිංහ ලේ’ කියන පදය, සිව්පද විරිතට අනුව ලියනවිට, වත්ත යන පදයෙන් ඈත්කොට, එම පදයේ ඉතිරි වචන ලියා, සිංහලේ යන පදය තවත් ඈත්කොට ලිවිය යුතුයි. එම කවියේ පද හතරම මෙලෙස ලිවිය යුතුයි. මේ සඳහා ඔබ කලයුත්තේ, columns තුනක් සහ raws හතරක් සහිත table එකක් හදාගෙන එම table එක තුල පද ටයිප් කිරීමයි (සිංහල යුනිකෝඩ් වලින්) ඉන්පසු ඇත table එක මකාදමන්න. නමුත් පද පිහිටීම ඒ විදිහටම තියනවා. දැන් එම කවිටික බ්ලොග් පෝස්ට් එකට cut > paste කරන්න. එවිට අර විදිහටම පේලි සමබරව පෙනෙනවා.

  3. මෙම කවි පන්තියෙන් බලා පොරොත්තු වන අදහස මොකක්ද?
    මට හිතෙන්නේ ඔබට සිංහල කියන වචනෙ ඇහෙනකොට තරහා යනවා වගෙයි. මෙය ලියා තියෙන්නේ දැඩි සිංහල ෆෝබියාවකින්.

  4. ඔබට සිංහල කියන වචනෙ ඇහෙනකොට අහේතුක වෛරයක් ඇතිවෙනවා නේද?

  5. සම්මානනයට පාත්‍ර වුණු කව් පන්තියක්….මේවට දෙන්නැත්තම් තවත් මොකකට දෙන්නදැයි සිතුණි

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s