නොපෙනෙන මානය සහ පෙනෙන අවමානය

දෙරණ රූපවාහිනි නාළිකාව මගින් සෑම පසළොස්වක පොහෝ දිනකම උදෑසන පෙන්වනු ලබන ඊනියා නොපෙනන මානය නම් වැඩසටහන සමග බැඳෙයි….

නිවේදක මහතාගේ හිස් මැදිහත් වීම 

මෙම වැඩසටහන මෙහෙයවනු ලබන නිවේදක මහතාට ඉතාම පැහැදිලිව ප්‍රේක්ෂක අපටත් දක්නට ලැබෙන පරිදි, එතැන කථා කරන දේවල් පිළිබඳව ( ගුප්ත සහ විද්‍යා දෙපාර්ශවයම ඉදිරිපත් කරනු ලබන ) මේ ලෝකේ දැනුමක් නැත…අවම වශයෙන් මනෝ විද්‍යාඥයන්, වෛද්‍යවරුන්, හෝ පාරම්පරික ගුප්ත ඇදුරන් ( කියා ගන්නා ) අයවළුන් නොවන අප මේ ක්ෂේත්‍රයන් ගැන කියවා ඇති ප්‍රමාණයවත් මෙවැනි වැඩසටහනක රිංග් මාස්ටර් තනතුර දිගටම හොබවන්නට බලාපොරොත්තු වන එම නිවේදක මහතා කියවා නැත…කොටින්ම කිව්වොත් අසා වත් නැත..( ඒ මහතාගේ අධ්‍යාපනික පසුබිම ගැන මෙම ලියුම්කරුවා කිසිවක් නොදනිතත්, ඒ මහතා මේ වැඩසටහන මෙහෙයවන ආකාරයෙන් මෙකී විවේචනයට පදනම් වන හැසිරීම ප්‍රකට වෙයි…)..එසේ හෙයින් වැඩසටහන පුරාවටම “පොල්ලෙන් ගහලා, කරකවලා අතෑරලා” බඳු හැසිරීමක් පෙන්වයි…වඩාත් තියුණු සහ දියුණු සංවාදයක් සඳහා දෙපාර්ශවයෙන්ම ඇසිය යුතු ප්‍රශ්ණ මොනවා දැයි ඒ මහතාට කිසිදු සදිසි අවබෝධයක් නැතැයි සිතුවත් වැරදි නැත….යම් සංවාදයක් සාරවත් වන්නේ එය මෙහෙයවන්නාත් “මේ කථා කරන්නේ මොනවා ගැනදැයි ” ප්‍රාමාණික දැනුවත් භාවයකින් යුක්ත නම් පමණි….එවන් වෘත්තිකයන් නිවේදකයන් වී මෙහෙයවනු ලබන සංවාද කෙතරම් ඵලදායීදැයි දැන ගැනීමට රිචඩ් ඩෝකින්ස්, ක්‍රිස්ටෝෆර් හිචන්ස්, පීටර් හිචන්ස්, රොබට් හොවෙල්, රූපට් ෂෙල්ඩ්‍රේක් වැනි විද්වතුන් සහභාගී වන සංවාද මෙහෙයවන නිවේදකයන් දෙස බැලීමෙන් දැන ගැනීමට පිළිවන…සංවාදයේ ගලා යාම හරවත් දිශානතියකට වීම උදෙසා නිවේදකයන් කළ යුතු මැදිහත් වීම ගැන දන්නා නිවේදක මහතෙකුට එම සංවාදය සඳහා වැයවන කාළයෙන් මෙයට වඩා ප්‍රයෝජනයක් ගත හැක….

ගල් කරන්නට ගොස් ඇණ ගැනීම සහ ඉක්බිතව අවලාද නැගීම 

භාරතීය සමාජය වෛදික ඝණ අන්ධකාරයෙන් වැසී තිබුණු යුගයක, එම අඳුර දුරලන්නට අතිශය දුෂ්කර සටනක නිරත වූ ශ්‍රේෂ්ඨ තර්ක ශාස්ත්‍රඥයාණන් වහන්සේ කෙනෙකුගේ චර්යා, ක්‍රියා, දේශිතයන් අනුගමනය කරන අයෙකු ලෙස තමන් හඳුන්වා ගන්නා පැවිදි උතුමෙකු මෙරට ගිළගෙන පවතින වංචනික, ප්‍රෝඪාකාරී, අගතිගාමී, අතීතයේම වළලා දැමිය යුතු මිථ්‍යාවන් රකින්නට වක්‍රාකාරව උත්සාහ දරන්නේ මන්දැයි අප නොදනිමු….( අප දන්නා දෙය නම් උන් වහන්සේ මේ විහිළු වලින් ආර්ථික වාසි ලබා නොගන්නා සඟරුවණක් බවය …එසේ හෙයින් උන් වහන්සේට මෙවැනි සමාජ පිළිල රකින්නට වෙහෙසෙන්නට සිතෙන්නේ ඇයිද? යන්න අපට ගැටළුවකි…)…තමන් වහන්සේගේ පරිශ්‍රමය මේ මිථ්‍යා බහුබූත ආරක්ෂා කිරීමට නොවන බව උන් වහන්සේ මගින් මගටම කීවත්, විද්‍යාවාදීන්ගෙන් උක්ථ මිථ්‍යාවන්ට, පට්ටපල් කෙබර වලට පහර වදින විට උන් වහන්සේගේ ස්වරය සහ හැසිරීම දැඩිවන, රළු වන  ආකාරය නිරීක්ෂණය කිරීමෙන් අපට උන් වහන්සේ උත්සාහ දරන්නේ ඒවා රැක දීමට බව තේරුම් ගැනීම අපහසු නැත….අවසානයේදී “ඇඟම වෙලා ගත් ඊනියා යකෙකු” සහිත රෝගියෙක් නුඹලාට පවරන්නේ නම් සුව කළ හැකිදැයි හේතුවාදීන්ගෙන් අසන තැනට උන් වහන්සේ පත්වීමත් සමග ඒ ස්වාමීන් වහන්සේගෙත්, ස්වකීය ප්‍රෝඪාකාරී බඩ රස්සාව රැක ගැනීමේ මරු විකල්ලෙන් දඟලන කට්ටඩි රාළගේත් අභියෝගයන් සමපාත වීමේ අවාසනාව බලා සිටින්නට අපට සිදුවිය….අනෙක් පසින් පැමිණ සිටි වෛද්‍යාවරයාට “නුඹේ ආගමික ස්ථාවරය හෙළි කරනු” යැයි ඝෝරනාඩු කරන්නට මත්තෙන් තමන් වහන්සේ ඊනියා ගුප්ත විද්‍යා ප්‍රෝඪාකාරයන් වෙනුවෙන් මෙතෙක් කරන ලද වක්‍ර පෙනී සිටීම සෘජු නියෝජනයක් බවට පත් කර ගැනීමට උන් වහන්සේට ධෛර්යයක් ඇතිදැයි ප්‍රේක්ෂක අපට ගැටළුවක් මතුවේ….

මෙවැනි අවස්ථා වලදී බුදුන් වහන්සේගේ දේශණය කුමක්දැයි විතාරණ බොහෝ දෙනා ඒ සඳහා නිදසුන් වශයෙන් ගනුයේ “කාළාම සූත්‍රය” යි…එනමුත් මෙවැනි අවස්ථාවකදී පිවිසීමට වඩාත් සුදුසුතම කියවීම වනුයේ දීඝ නිකායේ සීලක්ඛන්ධ වග්ග පාළියෙහි එන බ්‍රහ්මජාල සූත්‍රයයි…එම සූත්‍රයෙහිදී බුදුන් වහන්සේ තමන් වහන්සේවම නිදර්ශණයක් ලෙස ගෙන පාමින්, “ළාමක පහත්” ආජීවයන් ( එනම් රක්ෂා කර්මයන් ) ලෙස සැළකෙන දෑ වල ගිහියන්ගෙන් දානමානාදිය ප්‍රතිග්‍රහණය කරන ඇතැම් පැවිද්දෝ නියුතු වුවද, තමන් වහන්සේ ඒවායෙහි නොයෙදුණු බව ප්‍රකට කරන සේක…එයින්ම උන් වහන්සේගේ උත්තරීතරත්වය සමාජයට හුවා දක්වන සේක…මෙකී මිසදිටු, පහත්, ළාමක ආජීවයන්ට අද මේ ස්වාමින් වහන්සේ වක්‍රව ආරක්ෂාව සපයන, සහ කට්ටඩි රාළ බඩ රස්සාව කරගෙන සිටින සියල්ල අයත්ය…එහිදී කට්ටඩි රාළ නම් ගිහියාගේ ස්ථාන ගත වීමට ඒවා කෙසේ ගැළපුණත් ස්වාමින් වහන්සේ නමකට නොගැළපෙන බව මෙය දකින්නෝ අවබෝධ කරති….බුදු රජාණන් වහන්සේ වෙන අනෙකක් නොව, වෙද වෛද්‍ය කර්මයන්ද දානාදියෙන් වෙසෙන පැවිදි උතුමන්ට ළාමක සහ පහත් ආජීවයන්ය යනුවෙන් එකී සූත්‍රයේම දේශනා කර තිබෙන විට, මෙම ස්වාමින් වහන්සේ “ඇඟට වැසුණු යකුන් පන්නා දැමීම” නම් මනෝ විකාරයෙන් බඩවඩා ගන්නා අය සමග එකම පෙරමුණක හිඳිමින් හේතුවාදීන්ට “යකුන් පන්නා ලෙඩුන් සුව කරන්නැයි” අභියෝග කිරීම කෙතරම් ඛේදජනකද?

කෙසේ වෙතත් මිනිසුන් “ගල් කරන්නට” දරන ලද උත්සාහයෙන් මෙම වැඩසටහනට සහභාගී වන භික්ෂූන් වහන්සේ පැහැදිලිවම පරාජය වූ සේක…ඒ මේ සතියේදී එම භික්ෂූන් වහන්සේ මැදිහත්ව කළ ඊනියා මන්ත්‍ර ශාස්ත්‍රිත ගල් කිරීම ඒ අයුරෙන්ම වෛද්‍යවරයෙකු විසින් රෙදි පෙරෙදි, ඊනියා පිරිත් නූල් කිසිවක් නැතුව අමු අමුවේ කර පෙන්වූ නිසාය….අපේ ගමේ ගොඩේ ව්‍යවහාර භාෂාවෙන් මේකට කියන්නේ “ඇණ ගන්නවා” කියලාය…ඒ උනාට “ඇණ” ගත් පසුවත්, ඇණ ගත්තා ‍යැයි කියා පිළිගන්නා සිරිතක් අපේ සමාජයේ නැති නිසා මෙවර වැඩසටහන වන විට ඒ ඇණ ගැනීම වචන හරඹ වලින් ආවරණය කර ගැනීමේ නිරර්ථක උත්සාහයක නිරත වෙමින් සිටිනු දක්නට ලැබිණි….

සුපුරුදු පරිදි චීවරයේ ගරුත්වයට, ආගමික පූජක වරයට, සංස්කෘතියට, රටට, ජාතියට, ආගමට, බුදු හිමියන්ට මුවා වෙමින් ප්‍රතිවාදීන්ට ගෝරනාඩු කර, තර්කයට පණ දෙන්නට වෙර දරන විද්වතුන් මේ රටේ නූගත් ආධානග්‍රාහී ආගමිකයන් ඉදිරියේ “කුමන්ත්‍රණකාරී ද්‍රෝහීන්” ලෙස හංවඩු ගැසීමේ නිග්‍රහවාදය අවසානයේ මුදාහරින ලදී….

ඕනෑම අතාර්කික විකාර රූපී දෙයක් කරන්නට ගොස් ඇණ ගත් පසුව “බෞද්ධ කමට, සිංහල කමට” මුවා වීමෙන් ඒ පරාමිතීන් තුළ ඇස් බැඳගෙන සිටින නූගත් ජන සමූහයන් විසින් තමන්ට ආරක්ෂාව සපයනු ඇත යන “අවසාන වාසිය” යෙදූ පළමුවැනියා උන් වහන්සේ නොවේ…අඳුරු යුගයේ පටන් යුරෝපයේත්, වර්ථමානය දක්වා මැද පෙරදිග සහ උතුරු, නැගෙනහිර අප්‍රිකානු කළාප වලත්, ඊනියා කොමියුනිස්ට් දර්ශණයට වහල්ව සිටින රටවලත්, ප්‍රති-තර්ක හමුවේ පරාජය ලබාගෙන එනවිට ” මෙන්න මූ සාතන් වැහුණු කුමන්ත්‍රණ කාරයා, මූ ක්‍රිස්තු විරෝධියා, මූ යක්ෂයා වැහී සිටින්නා, මූ මිසදිටු ද්‍රෝහියා, මූ අල්ලාහ්ට අපහාස කරන්නා, මූ නිර්ධන පන්තිය පාවා දෙන්නා, බුෂුවා කුමන්ත්‍රණකාර කොම්ප්‍රදෝරුවා” යන ළාමක සමූහයා “කුළප්පු කරවන” කෑ කොස්සන් ගැහීම් වලට මුවා වී, එයින් කුපිත වන නූගත් පරිවාර ජනයා ලවා තමා පරාජය කිරීමට එන ප්‍රතිමත දාරියා විනාශ කොට, ඒ කුළප්පුවෙන්ම තම බඩවියතට, කීර්තියට හෝ තනතුරු තානාන්තර වලට හානිකර ප්‍රවාහයන් පීළි පන්නවා ගැනීමේ වාසිය සුලභව භාවිතයට ගැනිණි….දර්ශණයන් ආගමික සංස්ථා ලෙසින් විකසනය වූ ඕනෑම තැනක, ඒ සංස්ථාපිත තනතුරු දරන්නෝ තම තත්වයට එල්ල වන සබුද්ධික අභියෝග හමුවේ මෙසේ හැසිරුණාහුය…ඒ නිසා ඒ ගැන අප විමතියෙන් තොරය….

“මහණෙනි අසව් ! මා නුඹලා අමතමි ! සියළු සංස්කාර ධර්මයෝ නැසෙන සුළු වෙත් ! අප්‍රමාදව මෙයින් ගැළවී ලබන සදාතනික සැනසීම සම්පාදනය කර ගනුව! “ යන්න අන්තිම බුද්ධ වචනයයි….සියල්ලෙන් අත් මිදී පරි-නිර්වාණ සැපතට පැමිණෙමින් සිටි සිය නායකයාණන්ගේ අවසන් වදන් කෙසේ වෙතත්, රට, දැය සමය රැකීම, භාෂාව සුරැකීම, ජාතියේ මුරදේවතාවන් ලෙස කටයුතු කිරීම, ගිහියන්ගේ දේශපාලනයට රුකුල් දීම, හවුල් වීම, බාධා කිරීම යනාදි මෙකී නොකී දහසකුත් එකක් කටයුතු චිරාත් කාළයක සිට ලාංකික සංඝ ශාසනය විසින් ස්වේච්ඡාවෙන් තමන් වෙතම පවරාගෙන තිබෙන බැවින් උන් වහන්සේලා ඒවායේ නිරත වීම අපට ගැටළුවක් නොවන නිසා “මහණ දම් පිරීම සඳහා අවතීර්ණ වන්නේ කිසියම් ජාතියක මුර දේවතාවුන් වන්නටද?” යන පැණය අප උන් වහන්සේලාගෙන් නො-අසමු…ඕනෑම දෘඪ දර්ශණයක් කාළයත් සමග ආගමක් වන හෙයිනුත්, ඒ ආගම වටා යම් ජාතියක හෝ ජාතීන්ගේ ශිෂ්ඨාචාරයක් සැකසෙන හෙයිනුත් ඒ ලෝක ධර්මතාවය දන්නා ලියුම්කරුවා මෙය ගැටළුවක් කර නොගනියි…

එහෙත් අතීතයේ වළලා දැමිය යුතු, කම්මැලි කාළකණ්නියන්ගේ සහ පට්ටපල් හොරුන්ගේ බඩවියත රකින මිථ්‍යා දෘෂ්ඨීන් “සිංහල කම, අපේ කම හෝ අපේ සංස්කෘතිය” රකින මුවාවෙන් රකින්නට ඉදිරිපත් නොවන ලෙසට අදාළ ස්වාමින් වහන්සේලාගෙන් ඉමහත් ගෞරවයෙන් යුතුව ඉල්ලා සිටිමි…

උත්තරීතර තර්ක ශාස්ත්‍රඥයාණන් වන ගෞතම බුදුන් වහන්සේම පැහැදිලිව දෙසා වදාළ තර්කයේ ශ්‍රේෂ්ඨත්වයට පිටුපා, තක්කඩි හොරුන්ට බඩවියත සපයන බහුබූත විකාර වල රැකවරණය උදෙසා වක්‍රව පෙනී සිටින්නට ගොස් එම ස්වාමින් වහන්සේ මේ වනවිට පැහැදිලිවම පරාජයට පත්ව සිටියත්, උන් වහන්සේද බොහෝ දාර්ශණික උගත් කම් සහිත, රට තුල කීර්තිමත් ධර්ම කථිකයන් වහන්සේ නමක් ලෙස විශාල සමාජ මෙහෙවරක් සිදුකරන හෙයින් අප උන් වහන්සේ  ගැන කථාව මෙතෙකින් අත් හිටුවමු….තමන් වහන්සේ පැවිදි වූයේ කුමන අරමුණකින්ද, තමන් වහන්සේට පැවිද්ද ලබා දුන් ඒ ගුරු හාමුදුරුවරුන් එසේ පැවිද්ද ලබා දෙන මොහොතේ සිහි කරන්නට යැයි කීවේ මොනවාද, තමන් වහන්සේ දරා සිටින වස්ත්‍රය මින් පෙර දරන ලද්දේ කෙතරම් ශ්‍රේෂ්ඨයන්ද, එම නිසා තමන් වහන්සේ විසින් සමාජයේ සකසා ගත යුතු තැන, නාමය, කීර්තිය, පැවැත්ම කෙබඳුද යන්න තීරණය කර ගැනීම අප ඒ ව්‍යක්ථ ධර්ම කථිකයාණන් වහන්සේට භාර කරමු….ඒවාට අවවාද දෙන්නට යාමට අප සේවූ නොමේරූවන්ට කැප නොවන හෙයිනි….

කට්ටඩි රාළ රඟන ජෝකර්ගේ භූමිකාව 

මෙකී සභාවෙහි වාසළ කවටයාගේ චරිතය නිරූපණය කරන්නේ පාරම්පරික මාර පොරක් යැයි තමන්වම හඳුන්වා ගන්නා කට්ටඩි රාළය…

කට්ටඩි රාළගේ හැසිරීම දුටුවිට සිහිවන්නේ බුද්ධ කාළයේ විසූ ඊනියා ෂට් ශාස්තෘන්ගෙන් එක් අයෙකුගේ හැසිරීම් රටාවය…

සැවැත් නුවර සිටුවරයෙකු සැබෑ සෘද්ධිමතුන් සෙවීම සඳහා සිරස්ව පොළවේ සිටවූ උණ ගසක මුදුනේ සඳුන් දැවයෙන් කරවූ පාත්‍රයක් තැබූ කථාව ඔබ දන්නවා ඇතැයි සිතමි… මේ පාත්‍රය ගන්නට සෘද්ධිමතුන්ට අභියෝග කරන ලද අතර, සෘද්ධිමත් යැයි තමන්ව සම්මත කරවාගෙන සිටි බොහෝ දෙනෙකුගේ රෙදි පෙරෙදි මේ නිසා ගැළවිණි….සමහරු එම අභියෝගයට මුහුණ නොදී ගැළවීම සඳහා විවිධ ක්‍රමවේදයන් භාවිතා කරන ලදී…එයින් අපූරුම එක කළේ නිගණ්ඨනාථ පුත්තයන්ය…සෙනඟ බලා සිටියදී මොහු “මා මේ දැන් අහසට නැග පාත්‍රය ගනිමි” යි “පෙළහර පාමින් ” අහසට නගින්නට සැරසේ.. එවිට කළින් කථිකා කරගෙන සූදානම් කර තුබූ පරිද්දෙන් මොහුගේම ගෝළ පිරිස දිවවිත් ඒ නිගණ්ඨ ශාස්තෘවරයාගේ ඇඟේ එල්ලී “අනේ ස්වාමිනි, පාත්‍රයක් බඳු ස්වල්ප වස්තුවක් විෂයෙහි කුමක් පිණිස ඔබ වහන්සේගේ මහා ප්‍රාතිහාර්ය ශක්තිය ප්‍රදර්ශණය කරන්නෝද? අනේ ස්වාමිනි, පෙළහර නොපා මේ අඳ බාලයන්ට ඉවසුව මැනව” යැයි කියමින් හඬති….ඉතින් මෙසේ තමන්ගේ ගෝල පිරිස ඇඟේ එල්ලී සිටින විට නිගණ්ඨ නාථ පුත්ත තෙමේ ” ඉදින් මුන් මා වළකන හෙයින් අදට මෙහි පෙළහර නොපාම් ! හෙද යළිත් දිනෙක අපට අභියෝග කළොත් බලාගත හැක!” කියමින් සිංහ නාද කර සෙනඟ අතරින් පිටව යයි….

උක්ථ කවට කට්ටඩි රාළගේ හැසිරීමත් මෙබඳුය….එක එක දවසට එක එක විකාර රූපවාහිනි මැදිරියට ගෙන එයි…කරන ඉටි ගෙඩියක් නැත ! එක දවසක් මැරිච්ච වඳුරු මොටෙකුගේ හිස් කබළ උස්සාගෙන ඇවිත්, M – 16 රයිෆලයක් උස්සාගෙන ආවා සේ එය ලොවටම පෙන්වමින් “මෙය මහා භයානක දෙයක්” යැයි කීවේය….“ඉතින් ඒකෙන් මොනවා හරි කර පෙන්වන්නැයි” හේතුවාදීහු අභියෝග කළ විට උන්නැහේ ලොවෙත් නැතිය….තව දවසක් මොකක්ද පීරිසියක් වැනි යමක්, මල් බළියක්, තව ඉරටු කෝටු කෑලි වගේ බහු භූත රාශියක්, කොටින්ම කියතොත් ඉවත දැමිය යුතු කසළ ගබඩාවක් උස්සාගෙන ආවේය….මේ ලිපිය ලියන දිනය, එනම් අගෝස්තු 29 වැනි සෙනසුරාදා දිනයේ යෂ්ඨියක් සමග තව භාජනයක් සහ ඉරටු කෝටු කෑලි වගයක් උස්සාගෙන ආවේය….

හැමදාම වැඩසටහන පටන් ගන්නට සැරසෙද්දී “ඔන්න අද මම කොරලා පෙන්නන්ඤ්ඤං…. අද තමයි ඔප්පු වෙන්නෙ මගෙ බලේ”  යනාදි වහසි බස් දොඩයි…ඒත් වැඩසටහන මැදක් දුර යද්දී මිථ්‍යා දෘෂ්ඨීන් හෙළි වීම වැළැක්වීමට මේ අය සංවාදය පීළි පන්නන අතර, ඒ නිසා මාතෘකාවට අදාළ නොවන විකාර සාකච්ඡාවට ගැනෙද්දී මේ කට්ටඩි රාළ “ෂේප් එකේ” සිටින අතර, හෙතෙම වැඩසටහන අවසන් කරන්නේ ” මම ලබන පෝය දවසේ අම්බානක වැඩ කෑල්ලක් දාලා පෙන්නන්ඤං”  කියාගෙනය….ආයෙත් ලබන පෝය දවසටත් එච්චරය….කරපු බක්කක් නොමැති අතර, නූගත් මෝඩයන් රැවටීම මිස කරන්නට පුලුවන් බක්කක්ද ඇතැයි මෙම ලියුම් කරුවාට සිතෙන්නේ නැත…..උන්නැහේගෙ පරම්පරාවම කට්ටඩියන්ය කියයි නම්, ඒ පරම්පරාවේද තරම අපට සිතාගත හැක….මෙවර වැඩසටහනේදී “යක්කු දහ දෙනෙක් ඕන නම් හොඳ කරලා දෙන්නම්” යැයි හේතුවාදීන්ගේ සභාපති වරයා කී විට මහත් ආවේගයට පැමිණි කට්ටඩි රාළ “මගේ ඉවසීමේ සීමාව පන්න ගන්න එපා ! මේ මනුස්ස කමයි, සංවාදෙයි නිසයි ඉවසලා ඉන්නෙ” යනාදි වශයෙන් හිස් තර්ජන ගොන්නක් හේතුවාදීන්ට කරන තැනට පිරිහී ගියේය…..( යකුන්, නොමිනිසුන් “වැහීම”  වනාහි හිස්ටීරියා විශ්ලේෂණයන් සහිත මානසික රෝගී තත්වයන්ය….මෙලෙස රෝගී තත්වයට පත්ව සිටි බොහෝ දෙනෙක් ඔබ අප හොඳින් දන්නා හඳුනන අභාවප්‍රාප්ත මනෝ වෛද්‍යාචාර්ය ඩී.වී.ජේ හරිශ්චන්ද්‍ර මහතා ගාල්ල රජයේ රෝහල් වලදීත්, ගාල්ල සදර්න් පෞද්ගලික රෝහලේදීත් නිෂ්ඨාවටම සුවපත් කර ඇත…ඒ සඳහා Case Studies බොහොමයකි…)

නැවත නැවත සිහිවන්නේ නිගණ්ඨනාථ පුත්තගේ “පාන්නම් පෙළහර” ය….“ඔන්න වැඩ පෙන්නුවා ! මෙන්න වැඩ පෙන්නුවා ! ඔන්න මම දැන් වැඩ පෙන්නන්නයි යන්නේ !”  යනාදි නිගණ්ඨ වැඩ නොකොට කරනා දෙයක් රටටම කර පෙන්වන ලෙස මේ කට්ටඩි රාළගෙන් ප්‍රේක්ෂකයන් ඉල්ලා සිටිය යුතුය….

ඉහත නිගණ්ඨනාථ පුත්ත උදාහරණ කථාවේදී අහසින් ගොස් එකී සඳුන් පාත්‍රය ගත් පිණ්ඩෝල භාරද්වාජ රහතන් වහන්සේ අරභයා බුදුන් වහන්සේ ගිහියන් විෂයෙහි ප්‍රාතිහාර්ය පෑම තහනම් කොට එය “දුකුළා” ඇවැතක් ලෙසට නියම කළ සේක….එදා රහතුන් පෑ ප්‍රාතිහාර්යයත් බුදුන් වහන්සේ තහනම් කළ නිසා, අද දින මේ ප්‍රෝඪාකාරී ගිහියන් රකින්නට සංඝ ශාසනය තුළින්ම නියෝජනයන් පැමිණීම ගැන බලවත් කණගාටුවක් උපදී…..

ගුප්ත විද්‍යාව නම් වූ පතුලක් රහිත බැරලය 

ඊනියා “ගුප්ත විද්‍යාව” සහ ඊනියා “අපේ ශාස්ත්‍ර, මන්ත්‍ර ශාස්ත්‍ර” ආදිය සතු හර පද්ධතීන් සහ න්‍යෂ්ඨීන් හැම විටම පවතින්නේ මනුෂ්‍ය පංචේන්ද්‍රියට ගෝචර පරාසයෙන් ඔබ්බේ බැවින්ද, ඒවා පංචේන්ද්‍රිය ගෝචර කරගෙන මිනිසුන්ට “අනුභූතීන්” සහ ඒ අනුභූතිගත සංකල්ප පදනම් කරගත් විද්‍යාත්මක දැනුමක් සකසා ගත නොහැක….කොටින්ම කිව්වොත් විෂය බද්ධ දැනුම කෙසේ වෙතත්, නිවැරදි සාමාන්‍ය දැනුමක් හෙවත් ප්‍රකෘති දැනුමක් වත් ඇති කරගත නොහැක…..ඒ වගේ දැනුමක් නොමැති තැන ඇත්තේ “තාර්කික සීමාවන්ගෙන් තොර, නිශ්චිත දිශානතියක් හෝ පාලනයක් නොමැති” කයි කතන්දර ගොන්නක එකතුවකි…කවුරුන් හෝ කිසිදු පාරදෘෂ්‍ය ගවේෂණ ක්‍රමයකින් තොරව ඔහේ දොඩවන මොකක් හෝ විකාරයක් මත පදනම් වන කතන්දර එකතුවකි…එවැනි ඊනියා ශාස්ත්‍ර හැදෑරූ බව කියන ශාස්ත්‍රඥයන්ට ඔප්පු කරන ලද, පාර දෘෂ්‍ය යම් කොටසක් වෙතොත් ඒ “සංකල්ප” කොටස සහ ඔප්පු නොකරන ලද අදිසි, ගුප්ත පරාසය හුදු “ආකල්ප” වලින්ද තමන්ට රිසි සේ හසුරුවා ගත හැක…ඔවුන්ව පාලනය කරන්නට කිසිදු ඥාණ සභාවක් හෝ ශාස්ත්‍රාලගත ඥාණ විමංසාවක් නැත….බලාධිකාරිය වන්නේ ඔවුන්ගේ කට වචනයම පමණි….

අවිද්‍යාව නම් පතුළක් රහිත බැරලයකි…එයට වැටෙන්නට ගත්තාම එහි කෙළවරක් නැති නිසා අවම වශයෙන් තමා වැටෙමින් සිටින බවවත් වැටෙන්නාට නොහැඟේ….

මෙහිදී විද්‍යාව නියෝජනය කරන පිරිස හැම විටම අපහසුතාවයට පත්වේ…ඔවුන්ට සිදුවන්නේ “තාර්කික සීමාවන් සහිත, නිශ්චිත පරිමාවන් සහිත, සාමාන්‍ය දැනුම සහ විෂය ගවේෂක දැනුම මගින් සම්මත කරන ලද, ප්‍රශ්ණ කිරීමට බඳුන් කරන ඥාණ සභා, ශාස්ත්‍රාල සහ ඥාණ විමංසා සහිත” ශාස්ත්‍රයන් සමග ගොස්, ඉහත කී “අගෝචර, නිප්‍රකෘති, ඕනෑම මාදිලියක විකෘති, විසංවාදී අදහසක් වචන හරඹයෙන් සාධාරණීකරණය කළ හැකි” ඊනියා ශාස්ත්‍රයන් සමග සටන් වැදීමටය….එහෙම සටන් වලදී ඊනියා ගුප්තවාදීන් ඇස් පනාපිටම පරාජයට පත් වුවද, ජනප්‍රියත්වය සහ බඩගෝස්තරය පතා කරන ලද පට්ටපල් බොරු අතේ පත්තු වුවද, මොකක් හෝ මගුලක් කියා සිය ඇඳිවත රැක ගැනීමේ වරම ඔවුන්ට ඇත….ඒ අපාරදෘෂ්‍ය අවිද්‍යාව යනු අනන්ත අප්‍රමාණ පරාසයක් වන බැවිනි…ඉතින් බොහෝ වෙලාවට මිථ්‍යා ශාස්ත්‍රයන් සමග වාචාල කම මුසු වන්නේ නම් එවැනි අයට විද්‍යාව සහ සත්‍යය වෙනුවෙන් පෙනී සිටින අය “දෘෂ්‍ය පරාජයකට” ( Apparent Defeat ) පත් කළ හැක…බොහෝ විට එවැනි විවාද සිදුවන්නේ බහුතරය නූගත් ප්‍රේක්ෂක ප්‍රජාවන් ඉදිරියේ නම් තත්වය තවත් දරුණු අතර, එවැනි විටෙක අවිද්‍යාවර්ථීන්ට පහසු ජයක් රෙජිස්ටර් කරගත හැක…

උදාහරණයක් ලෙස : වර්ථමානයේ ගම්බද ජනතාවගෙන්, විශේෂයෙන්ම කාන්තාවන් බොහොමයක් දුකට පත් අසරණ මිනිස්සුන්ගේ ඉහමොළ සූරා කන පල් හොරුන්ට ආදායම් මාර්ග ලෙස පෙනී සිටින ඊනියා දෙවි දේවතාවියන් ගැන විශ්වාස තබති… එවැනි දේව ප්‍රජාව ආධානග්‍රහයෙන් ගනිති….මිථ්‍යාවන් අදහන අයගේ පොදු ලක්ෂණයක් වන්නේ තර්කයට ඇති නිසඟ භීතිය සහ තර්ක කරුවා කෙරෙහි ජනිත වන වෛරී සහගත හැඟීමයි…එවැනි විටෙක මිථ්‍යාව අදහන්නෝ පතන්නේ එයට එරෙහිව සාමාන්‍ය දැනුමෙන් තර්ක කරන අය නිග්‍රහයට පත්වීමයි…මිථ්‍යාවට ආදරය කරන තරමට අසරණ වී සිටින ඔවුන්ට මිථ්‍යාවේ නිරුවත පෙන්වන්නන් මහාම කරදරයකි…සමාජයේ නොසිටිය යුත්තෝ වෙති…ගෙදරකට වැද්ද ගත යුත්තෝ නොවෙති…

බොහෝ විට මිථ්‍යාව විකුණාගෙන කන්නෝ, මෙවැනි ඉලක්ක සමාජයන් වල මිනිස්සු හිතන පතන විදිහ, ඒ මිනිස්සුන්ගේ මානසිකත්වයන් මනෝ වෛද්‍ය විද්‍යාඥයන්ටත් වඩා බෙහෙවින්ම හොඳින් අවබෝධ කරගෙන සිටිති…ඒ අවබෝධය ඔවුන්ගේ ආදායම තර කර ගැනීම සඳහා භාවිතා කරන ප්‍රබලතම අවියයි….තමා හමුවට අසරණ වී එන තැනැත්තා දුටු වහාම මේ තැනැත්තාගේ සිත දිනාගෙන ඔහුගේ හෝ ඇයගේ මුදල් සූරා කෑමට යෙදිය යුතු ප්‍රයෝගය ගණනය කර ගැනීමට මිසදිටුවතෙහි වෙළෙන්දෝ දනිති…එහිලා ඔවුන්ගේ මනෝ විශ්ලේෂණයන්ට සිග්මන්ඩ් ෆ්‍රොයිඩ්ලා, ලැඛාන්ලා පවා පරාදය….

මේවා ගැන සංවාද කෙරෙන රූපවාහිනි වැඩසටහන් ආදිය බලන එවැනි අය සිටිත් නම්, ඒ “ගැලරිය” විසිල් ගහන්නේ මොනවාටදැයි එම වැඩසටහනේ මිථ්‍යාව නියෝජනය කරන්නෝ දනිති…ඒ නිසා සියළු ප්‍රෝඪාවන්ට කෙළ වේගෙන එනවිට ඔවුන් ගැලරියට විසිල් ගසන්නට අවස්ථාවන් ලබා දෙති…ඒ සඳහා ලාබදායීම සටන් පාඨ ලෙස රට, ජාතිය ආගම පෙරට ගනිති….ගෙන සිංහ නාද කරති…..මේ වනවිට මිසදිටුවාදීන්ගේ පරාජය දකිමින් “අනේ අපේ පොරවල් වලට කෙළවේගෙන නේද එන්නේ?” කියමින් විරවා පට්ටන් ගසාගෙන සිටින අඳබාල අනුගාමිකයන් මේ ලාබ තර්ක සහ බාළ ඝර්ජනා දැක “හුරේවා ! ඔය එන්නේ ! ඇර ඇර !” යන්න වෙනත් වචන වලින් කියමින් උඩ පනිති…අවසානයේ එවැන්නෝ බහුතරයක් සිටින රටවල මිසදිටු නියෝජකයන්ට “දෘෂ්‍ය ජයක්” අත්වෙති….

මිථ්‍යාව ‍යැපෙන්නේ :

1. භීෂණය මත – සොබාදහම නම් වූ මහා පරාසය තුල මිනිසාගේ පාලනයට තවමත් හසු නොවූ ප්‍රපංචයන් ඉදිරියේ කයින් සියුමැළි, ලෝම කූප වල ඝණකම සහ දිග අවප්‍රමාණ, පහසුවෙන් බිඳෙන සුළු සිරුරු ඇති මිනිසා අසරණය…බෙහෙවින්ම අනතුරු ඉදිරියේ නිරුවත්ය…අවකාශ- කාළ රීති හමුවේ සංතාපයටත්, ත්‍රාසයටත් පැමිණෙති.. උදා: ඊළඟ නිමේෂයේ වන්නට යන දේ නිවැරදිව කීමට අපොහොසත් හෙයින් මිනිසාට කාළයේ ඉදිරි නිමේෂයන් අවිෂය වේ…තමන්ගේ ඇසට නොපෙනෙන බලවේග යැයි කියන ඒවායේ බලපෑම මිනිසාට ඉන්ද්‍රිය ගෝචර නොවන හෙයින් මිනිසාට දෘෂ්‍ය පරාසයෙන් ඔබ්බෙහි අවකාශය අවිෂය වේ…මේ අවිෂය වීම ඔවුන්ට දරාගත නොහැකි භීෂණයකි…

2. කුතුහලය මත – ඉහත කී සියළු අවිෂය කරුණු කාරණා මිනිසාව දැඩි කුතුහලයකට ලක් කරයි

3. සම්ප්‍රදාය මත / සංස්කෘතිය මත – විද්‍යාත්මක පියවර පෙළකින් මිනිසාට කළ හැකි බොහෝ දේ අතිශය සීමිතව පැවති ප්‍රාථමික යුගයන් වලදී ඇති කරගත් ඇතැම් සම්මුතීන් සහ සම්ප්‍රදායන් මෙන්ම ඒවා පදනම් කරගත් සංස්කෘතීන් අදටත් නොනැසී පැවතීමේ අවාසනාව නිසා මිථ්‍යාවට කදිම වගාබිම් බිහිවේ….ඒවාට එරෙහිව හඬ නගන්නට යන්නෝ අතාර්කිකයන්ගේ ගොදුරු බවට පත්වෙති….කොටින්ම කියතොත් මිථ්‍යාව එහි වින්දිතයන් විසින්ම රකිත්…ඔවුන් ලවා එය රැක්කවීමද ඉතාම පහසුය….

මේ සා විශාල සොබා දහමක, මේසා කුඩා නග්න වානරයෙකු වන මිනිසා හමුවේ මිථ්‍යාව ඉහත පෝෂක ප්‍රභේදයන් මත පහසුවෙන් යැපෙති….

18 ලක්ෂයක් මැද පෙරදිග පිළිකණු වල නිරා දුක් විඳින, වසරකට දහස් ගණනක් පුරවැසියන් මරුවා කිහිළි ගන්නාගෙන බෝට්ටු වලින් විදේශ රටවලට පලා යන තුන්වනි ලෝකයේ හිඟන රටක ජනතාව අවධානය යොමු කළ යුත්තේ “මිනිසුන් ගල් කර පොලු උඩ ගෙන යා හැකිද?” යනාදි මනෝ විකාර ගැටළු වලටද යන්න වෙනම අවධානය යොමු කළ යුතු ප්‍රශ්ණයක් වුවත්, මේ වනවිට මිථ්‍යාවට එරෙහිව විද්‍යාත්මක චින්තනය දරන තරුණ පිරිස් යම් අසංවිධිත ප්‍රහාරයක් දියත් කර තිබීමත්, ඒ ප්‍රහාරයට ඉස්මතු වන්නට මෙවැනි විකාර අවකාශය සපයන නිසාත් මේ මොහොතට ඒ වැදගත් යැයි සිතමි….කෙසේ වෙතත් මේ වැඩසටහනේ ක්‍රියාකාරකම් වල පාරදෘෂ්‍ය බව සහ සාධාරණය රැකෙනු වස්, දෙපාර්ශයවම එකට සිට මිනිසුන් ගල් කිරීමක් කර පෙන්වන්නැයි ඉල්ලා සිටිය යුතුය…එවිට රෙදි වලින් වසා ඊනියා මන්තර මතුරා කරන ලද ප්‍රෝඪාවේ නිරුවත එවෙලේම ප්‍රදර්ශණය කිරීමට අවස්ථාවක් ලැබෙනු ඇත…එහෙත් ඒ නිරුවත ඒ මොහොතේම එළි වූවත්, ඒවා නියෝජනය කරන අය ඒ පරාජය පිළිගනිතියි අපේක්ෂා නොකළ යුතුය…මිථ්‍යා ආජීවකයන්ගේ හැටි එහෙමය….අද දින සංවාදයේදී මතු වූ “මෝහණයෙන් සහ ශරීර ශක්තියෙන් යන ක්‍රමවේදයන් දෙකෙන්ම මිනිසෙකු ගල් කර මෙසේ ගෙන යා හැකි නම්, තුන්වෙනි ක්‍රමයක් ලෙස මන්ත්‍ර බලයෙන් ගෙන ගියා යන්න පිළි නොගන්නේ මන්දැයි?” මතු කරන ලද හාස්‍ය ජනක තර්කය එයට කදිම නිදසුනකි…

මෙවැනි දේ ගැන වෙනත් ග්‍රහලෝක Terraforming ක්‍රියාවලියට ලක් කර, පාර-භෞමික ජීවය පිහිටුවන්නට විද්‍යා ප්‍රජාව වෙර දරන මෙවැනි සියවසක, ප්‍රසිද්ධ රූපවාහිනි මාධ්‍යයක් තුළ කථා කර කර ඉන්නට සිදුවීමත් එක්තරා විදිහකට ජාතියක අවාසනාවකි….එනමුත් මෙවැනි යුගයක ප්‍රෝඪාවන් කර මිනිසුන් රවටා තමන්ගේ තත්වය රැකගැනීමට ඉඩ නොතැබිය යුතුය යන තිර අදිටනින් යුතුව පෙරට පැමිණි මෙරට විශේෂඥ වෛද්‍ය ප්‍රජාවට මෙම ලියුම්කරුවාගේ අතිමහත් ගෞරවය හිමිය….

Advertisements

6 thoughts on “නොපෙනෙන මානය සහ පෙනෙන අවමානය”

  1. සුපිරි කියන්නේ සුපිරියටම ලියල.ලියුම්කරුගේ දක්ෂතාවය උපරිමයි.අපිත් ඕක බලල ඔහොමම හිතුව

  2. ආරම්භයේ සිටම නොපෙනෙන මානය වැඩසටහන නැරඹූ, එහි පළවෙන මතවාද පිළිබඳව උනන්දුවෙන් සිටින අයෙකු ලෙස මෙම ලිපිය සමග සම්පූර්ණයෙන්ම එකඟ වෙමි. නිවේදකයාගේ හිස් බවත්, ස්වාමීන්වහන්සේ දරුණු ලෙස තම ආධිපත්‍යය සාකච්ඡා මණ්ඩපය තුළ පැතිරවීමට උත්සාහ කිරීමත්, කට්ටඬි ජෝකර් මාමාගේ යන්නෙ කොහෙද මල්ලෙ පොල් ප්‍රකාශත් සෑම වැඩසටහනකදීම දැකගත හැකිය. මුල් වැඩසටහන් කිහිපයකට මේ දිනවල “මාර හිට් එකක්” වී ඇති සුජිත් නිශාන්ත ද සහභාගී වුවද පසුව “මට ලැබෙන කාලය මදි.” යයි අඳෝනා දී චුත වී ගියේය.

  3. නොපෙනෙන මානය – පෙනෙන අවමානය !
    …සියල්ල මැජික් වලින් සහ මානසික විකෘති ලෙස තේරුම් ගතහැකිද? මේ දෙවල් වලින් ගහ කොල සතා සීපාවටත් වෙනසක් කල හැකි බව අත්දැක තිබේ. පාරම්පරික දැනුම ගැන කතා පාර්ශවයට විද්යාමක දැනුම zero නිසා නාගැනීමට සිදුවීම පුදුමයක් නොවේ . අද හරි දේ හෙට අභියෝගයට ලක්වන විද්‍යාව ගැන හරියට කතා කිරීමට දන්නා එකෙකු නොසිටීම අඩුවකි. ගුරැන් ලෙස පෙනීසිටින මැජික් පෙන්වා මිනිසුන් රවටා බඩගෝස්තරය රැකගන්නා රැලක් බිහිවී සිටීමෙන් පමනක් සමස්ත පාරම්පරික හර පද්ධතියම අගාධයටම පතිත වී ඇත.

  4. මාත් ආතල් එකට බලන වැඩසටහනක්. මේ කරුණු එක්ක එකඟයි.
    හැබැයි හේතුවාදීන් සමහර වෙලාවට ඇනගන්නව බුදුන් අසුවල් දේ කීවා යයි හෝ නොකීවා යයි කියන්න යාමෙන්. මේක බලද්දි මට හිතුන දෙයක් තමයි අන්තර්ජාලයේ අපි එක්ක ඉන්න රිට්ටා වගේ කෙනෙක් හිටිය නං කට උත්තර නැති වෙන්න දෙන්න තිබුන කියන එක.

    හාමුදුරුවන්ගේ අවුල මම දකින විදියට මේකයි.
    කට්ටඩියා උගේ තක්කඩිකම ඔප්පු කිරීමට යොදාගන්නේ බුදුදහම. මේක බොහෝමයක් තක්කඩි කරන වැඩක්. සමාජයට කෙලින්ම අවිද්‍යාව කාවද්දනවට වැඩිය වෙනත් පිලිගත් මතවාදයකින්(බුදුදහම, විද්‍යාව….) ශැන්ඩි කර ගිල්ලවීම ලෙහෙසියි. උදාහරණයක් විදියට ජ්‍යොතිෂය නිසා ඇතිවන බලපෑම “කර්මය” කියල කිව්වම බෞද්ධයො අන්දන්න ලෙහෙසියි.

    තක්කඩියන්ගෙ මේ ලණුව ගෙඩිය පිටින්ම ගිලිනව අපේ හාමුදුරුවොත්. ඉතිං අන්තිමට වෙන්නෙ අවිද්‍යාව ආරක්ෂා කරගන්න හේතුවාදීන්ට/විද්‍යාවට පහරදෙන තැනට හාමුදුරුවො තල්ලු වීම

  5. ඔබ මේ මේ දීර්ඝ ලිපිය පුරා පෙන්වා දෙන්නේ සම්පූර්ණ සත්‍යයකි…..

    වත්මන් ලාංකික සමාජය මෙවැනි අඳුරු අගාධයකට ඇද වැටෙන්නට හේතුව කුමක්ද ? අප දැන් ඒ ගැන විමසා බැලිය යුතු ය.

    “මහණෙනි අසව් ! මා නුඹලා අමතමි ! සියළු සංස්කාර ධර්මයෝ නැසෙන සුළු වෙත් ! අප්‍රමාදව මෙයින් ගැළවී ලබන සදාතනික සැනසීම සම්පාදනය කර ගනුව!

    මේ ඔබම, ඔබගේ ලිපියේ සටහන් කළ වැකියකි.
    වත්මන් ශ්‍රී ලාංකික ජන සමාජය මෙතරම් අඳුරු අගාධයකට ඇද වැටෙන්නට හේතුව, මෙම සටහන තුළ ගැබ්ව ඇත.

    හන්දදානි භික්ඛවේ – ආමන්තයාමි වෝ
    වයධම්මා සංඛාරා – අප්පමාදේන සම්පාදේත

    මේ අවසන් බුද්ධ වචනයයි. එම පාලි ගාථාවේ අදහස වර්තමානය වන විට සිංහල බෞද්ධයන් අතර පවතින්නේ ඉහත ඔබ දක්වා ඇති ආකාරයෙනි. එම වැකිය තුළ ඇති අදහස සත්‍ය වශයෙන් ඔබේ ප්‍රඥාවට ගෝචර වේදැයි විමසා බලන්න… එම වැකිය තුළ ඔබට නිවන් මගක් පෙනේදැයි ප්‍රඥාවෙන් විමසා බලන්න…..

    අනාවරණ ඤාණයෙන් ලොව සියලු තතු අතැඹුලක් සේ දත් ප්‍රඥාවෙන් අසමසම වූ තථාගත ලොව්තුරු බුදු පියාණන් වහන්සේ, පන්සාලිස් වසක් තිස්සේ ධර්මය දේශනා කොට, අවසානයේ දේශනා කරන්නට ඇත්තේ, මෙබඳු අග මුල නොවැටහෙන කතාවක්ද ??
    ශත වර්ෂ ගණනාවක් තිස්සේ මෙරට ආර්ය ශාසනය අතුරුදහන් වෙමින්, මහණුන්, හිස් මහණුන් බවට පත් වෙමින්, ඔබ පවසන පරිද්දෙන් ශාසන අර්ථය වනසන්නේ, මෙසේ බුද්ධ භාෂිතයේ නිර්මල අර්ථය විපරීත කර ගත් බැවිණි.

    සැරියුත් මා හිමියන්ගේ මූලිකත්වයෙන් ලියැවුණු පටිසම්භිදාමග්ගප්පකරණය නම් අටුවාවට අනුව වය යනු හේතුවකින් ප්‍රත්‍ය වූ යමක් හේතුව නිරෝධ කිරීමෙන් ක්ෂය කළ හැකි, නිරෝධ කළ හැකි, වැය කළ හැකි, අවසන් කළ හැකි, නිමක් කළ හැකි, කෙළවරක් කළ හැකි යන අර්ථයයි. ඒ අනුව වය ධර්ම යනු හේතුව නිරෝධ කිරීමෙන් නිරෝධ කළ හැකි ධර්මයෝ යන්නයි.

    සංඛාර යනු සංඛතයක් සකස් කරන්නා වූ සියලු සිතිවිලි, වදන්, ක්‍රියාවෝයි (මනෝ සංඛාර, වචී සංඛාර, කාය සංඛාර). සෑම සංඛාරයක්ම සසර ගමනට හේතු නොවේ. සසර ගමනට හේතු වන්නේ කර්ම විඤ්ඤාණයක් ගොඩ නැංවීමට හේතුවන සංඛාරයන් පමණි. ඒවා අභිසංඛාර ලෙස හඳුන්වයි. අභිසංඛාර නම් අවිද්‍යාව මුල් වී සත්වයා රාගයෙන් (ලෝභයෙන්), ද්වේෂයෙන්, මෝහයෙන් හා අලෝභයෙන්, අද්වේෂයෙන්, අමෝහයෙන් සිතන, කියන, කරන දෑ ය.

    සංඛාර හට ගන්නේ සංඛතය පහළ වීමෙනි. සංඛාර නිසා සංඛතය හට ගනී. සංඛතය නිසා සංඛාර හට ගනියි. පංච උපාදානස්කන්ධයද සංඛතයකි. ඕනෑම සංඛතයක සංඛාර දුක්ඛය (සකස් කිරීමේ / ක්‍රියා කිරීමේ / පුනරුත්ථාපනය වීමේ / වෙහෙසීමේ / ජීවිතය ගැට ගසා ගැනීමේ දුක්), දුක්ඛ දුක්ඛය (ලෙඩ දුක්, කැඩී බිදී යාම්, අතුරු ආන්තරා, උපද්‍රව නිසා ඇතිවන දුක්), විපරිණාම දුක්ඛ (මොහොතින් මොහොත ජරාවට පත්වීම නිසා වැනසීම නිසා ඇතිවන දුක්) යනුවෙන් දුක් තුනක් ඇත. මම යනුවෙන් හටගත් සංඛතය තුළද එම දුක් තුන නොඅඩුව ඇත. මොහොතකින් ගෙවී යන ආස්වාදයන්ට රැවටී අතීදර්ඝ කාලයන් තිස්සේ සතර අපා දුක් විඳිමින් සත්වයා මේ අසාරවත් සසර ගමන තුළ යන්නේ, මම තුළ ඇති මෙකී දුක්ඛස්කන්ධය ප්‍රඥාවෙන් නොදුටු නිසා ය. ප්‍රඥාවෙන් අවබෝධ නොවීම නිසා ය.

    සසර ගමන යනු දුකක්ම බවත්, නිවන යනු සැපක්ම බවත්, ප්‍රඥාවෙන් ස්පර්ශ කළහොත්, දුක්ඛස්කන්ධය යළි යළි ජනනය කරන්නා වූ මෙකී සියලු සංඛාර නිරෝධ කිරීමට වීර්යය ඇති කර ගත හැකි ය. පටිච්ච සමුප්පාදයට අනුව සංඛාර ප්‍රත්‍යය වන්නේ අවිද්‍යවෙනි (අවිජ්ජයා පච්චයා සංඛාරා…..)

    තථාගත බුදු පියාණන් මෙසේ දේශනා කළ සේක.
    දුක්ඛේ අඥානං, දුක්ඛ සමුදයේ අඥානං, දුක්ඛ නිරෝධයේ අඥානං, දුක්ඛ නිරෝධ ගාමිණි පටිපදාය අඥානං අයං වුච්චති අවිජ්ජා …..
    අවිද්‍යාව යනු සසර ගමන තුළ භවයෙන් භවයට මමෙක් සාදා ගනිමින් සත්වයා මේ නැවත නැවත ගොඩ නගා ගන්නේ දුක්ඛස්කන්ධයක් බවත්, එම මහා දුක් කඳ හට ගන්නේ සැපයක් ලෙස පෙනෙන පංචකාමය නමැති උගුලට අසුවීමෙන් ඒවා ආස්වාදනය කරන්නට යාමෙන් බවත්, පංචකාම සහිත ලෝකයට ඇති කැමැත්ත ප්‍රහාණය කිරීමෙන් එම මහා දුක් කඳ අවසන් කළ හැකි බවත් (එය නිර්වාණය බවත්), ඒ සඳහා ඇති මාර්ගය වන අවිද්‍යාව හා තෘෂ්ණාව ප්‍රහාණය කිරීමේ වැඩ පිළිවෙලින් (අරි අටඟි මග්ගෝ) සංඛාර නිරෝධ කළ හැකි බවත් ප්‍රඥාවෙන් අවබෝධ නොවීම නිසා සත්වයා තුළ මුල් බැසගෙන පවතින මුළා සහගත මානසිකත්වයයි. මුළා සහගත දෘෂ්ටි සමුදායයි. තවත් ආකාරයකට කිවහොත් අවිද්‍යාව යනු මෙකී චතුරාර්ය සත්‍යයන් ප්‍රඥාවෙන් අවබෝධ නොකිරීම නිසා සත්වයා තුළ ඇති වන මුළා සහගත මානසිකත්වයයි.

    එසේනම්, පරම දුර්ලභ ශ්‍රී සද්ධර්මය අසා ධර්මාවබෝධය ලැබ යමෙකු අවිද්‍යාව ප්‍රහාණය කරයි නම්, පටිච්ච සමුප්පන්නව තෘෂ්ණාවද ප්‍රහාණය වෙයි. අවිද්‍යාව හා තෘෂ්ණාව ප්‍රහාණය වූ විට සංඛාර ප්‍රහාණය වෙයි. නැතහොත් සංඛාර නිරෝධ වෙයි. සංඛාර නිරෝධයෙන් විඤ්ඤාණ නිරෝධ වෙයි. විඤ්ඤාණ නිරෝධයෙන් නාම රූප නිරෝධ වෙයි. නාම රූප නිරෝධයෙන් සලායතන නිරොධ වෙයි. සලායතන නිරෝධයෙන් ඵස්සය නිරෝධ වෙයි. ඵස්ස නිරෝධයෙන් වේදනා නිරෝධ වෙයි. වේදනා නිරෝධයෙන් තණ්හා නිරෝධ වෙයි. තණ්හා නිරෝධයෙන් උපාදාන නිරෝධ වෙයි. උපාදාන නිරෝධයෙන් භව නිරෝධ වෙයි. භව නිරෝධයෙන් ජාති නිරෝධ වෙයි. ජාති නිරෝධයෙන් ජරා, මරණ, ශෝක, පරිදේව, දුක්ඛ, දෝමනස්ස, උපායාස යන මුළුමහත් දුක්ඛස්කන්ධයම නිරෝධ වී යයි. නිර්වාණයට පත් වෙයි.

    තථාගත බුදු පියාණන් වහන්සේ, අවසන් බුද්ධ වචනයෙන්ද පෙන්වා දුන්නේ, මර උගුලක් වූ අසාරවත් වූ පංච කාමයන්ට ප්‍රියත්වයෙන් ඡන්දරාගෙයන් (තණ්හාවෙන්) බැඳ‍ෙමින් නැවත නැවත මමෙක් සාදා ගනිමින් යන අසාරවත් බිහිසුණු සසර ගමන ජනනය වීමට මුල් වන සියලු සංඛාර (අභිසංඛාර ප්‍රමුඛව) අනිච්ච වශයෙන් දැක (අනිසි වශයෙන් / නුසුදුසු වශයෙන් / දුක ගෙන්නා වූ කරුණක් වශයෙන් / පෙළීමට මුල් වන්නා කරුණක් වශයෙන් / බිය ගෙන දෙන්නා වූ කරුණක් වශයෙන්) ඒවා නිරෝධ කරන ලෙසයි.

    සබ්බේ සංඛාර අනිච්චාති – යදා පඤ්ඤාය පස්සති
    සියලු සංඛාරයෝ අනිසි වෙත් – එය ප්‍රඥාවෙන් දකින්න

    වයධම්මා සංඛාරා යනු, සංඛාරයෝ නිරෝධ කළ හැකි ධර්මයෝ යන්නයි. සංඛාර නිරෝධ කළ හැක්කේ අවිද්‍යාව නිරෝධ කිරීමෙනි. අවිද්‍යාව නිරෝධ කළ හැක්කේ, මම යන සාදා ගත් පංච උපාදානස්කන්ධය අනිච්ච වශයෙන් (අනිසි වශයෙන් / නුසුදුසු වශයෙන් / දුකට මුල් වන්නා වූ කරුණක් වශයෙන් / පෙළීමට මුල් වන්නා කරුණක් වශයෙන් / බියට මුල් වන්නා වූ කරුණක් වශයෙන් / අසහනයට මුල් වන්නා වු කරුණක් වශයෙන්), දුක්ඛ වශයෙන් (ලෙඩ රෝග ව්‍යාධි දුක් ඇති කරන්නක් වශයෙන් /කරදර හිංසා පීඩාවලට ලක්වන්නක් වශයෙන් / විවිධ බිය ගෙන දෙන්නක් වශයෙන් / විවිධ පෙළිම්වලින් දුක් ඇති කරන්නක් වශයෙන් / විවිධ අතුරු ආන්තරා උපද්‍රවයන්ට මුහුණ දෙන්නක් වශයෙන්) අනත්ථ වශයෙන් (කැඩී බිඳී වැනසී යන්නක් වශයෙන් / මොහොතින් මොහොත ජරාවට පත් වන්නක් වශයෙන් / අවසානයේ මගේ යැයි ගත හැකි කිසිවක් ඉතිරි නොවන අසාර වූවක් වශයෙන් / මගේ යැයි අල්ලා ගන්නට සුදුසු කිසිවක් නොමැති වශයෙන් / ශුභ වශයෙන් ගත හැකි කිසිවක් නොමැති වශයෙන්) ප්‍රඥාවෙන් විදර්ශනා කර බැලීමෙනි.

    හන්දදානි භික්ඛවේ ආමන්තයාමි වෝ
    වයධම්මා සංඛාරා – අප්පමාදේන සම්පාදේථ

    එසේ නම් මහණෙනි
    මම නුඹලා අමතමි
    සංඛාරයෝ නිරෝධ කළ හැකි ධර්මයෝය
    අප්‍රමාදීව ඒ සඳහා වෑ්‍යම් කරන්න

    මෙම අවසන් බුද්ධ වචනයේ නිර්මලද අර්ථය මුලින් කී අන්දමින් වැසුණාට පසු, සමාජයේ මිථ්‍යාවන් රකිමින් සමාජයට බොරු බණ කියනවා හැර ඔවුන් අන් කුමක් කරන්නද ? ඔවුන් කෙසේ මාර්ගය ප්‍රගුණ කරන්නද ?

    නුවණැති සත් පුරුෂයෝ කළ යුත්තේ, අප්‍රමාදිව මෙම තථාගත ධර්මය අවබෝධ කොටගෙන මෙම දුක්ඛිත සසර ගමනින් මිදී යාමයි.

    http://www.waharaka.com/deshana/tags.php

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s